Meghalaya : UNESCO World Heritage list-a telh turin Living Root Bridges rawt

Meghalaya-a Living Root Bridges, Jingkeing Jri/Lyu Charai Cultural Landscape tiha hriat bawk chu India chuan kum 2026-27 chhunga UNESCO World Heritage List-a telh atan rawt a nih thu sorkar laipuiin March 23 khan Parliament a hriattir. He rawtna hi pawm a nih chuan Living Roots Bridges chu khawvel pumah hriat a hlawh tawh dawn a ni.

Lok Sabha-a ziaka chhanna a pekah, union culture minister Gajendra Singh Shekhawat chuan he rawtna hi UNESCO World Heritage Centre-ah thehluh a nih tawh thu a sawi. Tualchhung miten 'Jingkieng Jri' tia an sawi, he root bridge hi Meghalaya-a Khasi tribal community-ten rubber fig thing zung hmanga an siam lei dangdai tak a ni. Ramngawa awm niin, an nghet ṭha hle a, sik leh sa inthlakdanglam nasa tak karah pawh an chhe thei lo a ni. Khaw eng emaw zatin inkalpawhna atan an hman ṭangkai bawk.

Sorkar laipui chuan Uttar Pradesh-a Ancient Buddhist Site of Sarnath chu list-a telh turin a rawt tel bawk. India hian UNESCO World Heritage Site 44 a nei mek a ni.