Nagaland : Dimapur DC-in LPG supply endiktu tur committee din

Nagaland-a Dimapur DC office chuan LPG leh petroleum product dangte sem chhuah dan endik a, dik lo taka chhekkhawl, dan loa hralh chhuah leh man to taka hralh ṭhin tihtawpna leh veng turin district-level committee a din. Dik lo taka thiltite chu na taka hrem an nih tur thu a sawi.

March 23-a thupek a tihchhuahah, Dimapur DC Tinojongshi Chang chuan district ADC chu committee convener atan ruat a ni tih a tarlang. Member dangte chu- DCP, District Civil Supplies Officer, Assistant Controller of Legal Metrology, Extra Assistant Commissioner (Sadar), State Level Coordinator of IOCL, Senior Depot Manager of IOCL Dimapur, leh BPCL Field Officer te an ni.

Committee leh enforcement team chuan dan loa LPG chhekkhawl leh hralh bakah man to taka hralh tur venna atan endikna an nei dawn a ni. Dan zawm lote chu Essential Commodities Act, 1955, the LPG (Regulation of Supply and Distribution) Order hmangin na taka hrem an ni dawn tih thupek chuan a tarlang. DC chuan Food and Civil Supplies Department kaihhruaina angin, district-a LPG cylinder sem dan tur circular a tichhuak bawk. Circular-ah hian damdawi-in, zirna in, hotel, restaurant, bakery, dairy leh transport kaihhnawih chu ngaih pawimawh an ni dawn tih a tarlang.