Assam : AGP-in BJP kaihhruai sorkar thlawpna hnukdawk mai thei
Assam-a BJP kaihhruai ṭangrual sorkar thlawptu, Asom Gana Parishad (AGP) chuan BJP nena an thawhdunna an titawp mai thei tih a sawi.
AGP senior leader leh chief minister hlui Prafulla Kumar Mahanta chuan an party-in Citizenship (Amendment ) Act (CAA) a thlawp chuan a lawm lo hle tih sawiin, "Lok Sabha leh Rajya Sabha-a Citizenship (Amendment) Bill thlawp zawnga kan vote kha a pawi hle a ni," tiin he dan an lo thlawp chu an tihsual palh a ni tih a sawi.
Prime Minister leh Home Minister-te chu Assam mipuite dinhmun ngaihtuahpui tura a duh thu sawiin, he Act hi Assam-ah hman a duh lo a, "Assam chuan he dan hi an pawm ve ngai lo ang," tiin a sawi. Hei vang hian Assam-a BJP kaihhruai sorkar an thlawp chhunzawm zel dawn leh dawn lo an ngaihtuah mek tih a sawi. AGP hian MLA 12 neiin BJP nen ṭangrual sorkar hi an siam a ni.
Guwahati leh state chhung hmun hrang hranga CAA duh lohna nasa takin lantir a ni a, CAB pass a nih theihna tura AGP in Parliament-a BJP a thlawp avangin mipuite an thinur a, hei hi AGP pawh hian an hrethiam tawh a ni.
Thawhṭanni khan AGP president leh minister Atul Bora leh an party minister dang pahnihte chuan Assam finance minister Himanta Biswa Sarma pawh a inah an lo kawm tawh bawk. Meeting an neih zawh hnuah BJP hruaitu Himanta Biswa Sarma chuan AGP hruaitute nen hian an inbe mek a, thutawp erawh siam a la ni lo tih a sawi.