Assam : Candidate pakhatin bank account 37 leh motor 32 nei

Assam Legislative Assembly inthlan neih tura Kokrajhar Assembly constituency-a Bodoland People’s Front (BPF) candidate, Sewli Mohilary chuan bank account 37 leh motor 32 a nei a, a motor neih zingah hian tipper truck 16 leh tractor pali an tel.

Kum 49 mi, Sewli Mohilary hi Bodoland Territorial Council chief Hagrama Mohilary nupui a ni. Affidavit a theh luhah a thil neih hlut zawng hi Rs vbc 54.04 niin, a bank account 37-ah a sum dahte hi rs vbc 5.26 niin a motor ho hlutzawng hi Rs vbc 12 chuang a tling. Hei bakah ram leh building eng emaw zat, Rs vbc 20.03 hu a nei bawk.

A pasal, Hagrama Mohilary hausakna erawh Rs vbc 9.17 hu a ni thung a, bank account pariat bakah motor pakhat a nei.

All India United Democratic Front (AIUDF) hotu, kum 70 mi Mohammed Badruddin Ajmal hausakna chu Rs vbc 222.34 a ni a, bank account pariat neiin, a account-a pawisa awm zat hi Rs vbc 52.43 an tling. Motor paruk a nei a, a motor hlut zawng hi Rs vbc 2.17 a ni bawk.

BJP candidate, chief minister Himanta Biswa Sarma leh a nupui, Riniki Bhuyan Sarma te hausakna chu kum 2021-ah Rs vbc 17.27 a nih laiin 2026-ah Rs vbc 35.16 a tling. 2021 leh 2026-ah affidavit a theh luhah hian a naupan lai ṭhin, Board of Control for Cricket in India (BCCI) secretary leh Assam advocate general Devajit Saikia hnen aṭanga Rs nuai 2 a puksak thu tarlan a ni ve ve a ni.

Seat 126 awmna, Assam assembly inthlan neih tura chuh tum, mi 815 te nomination paper theh luh chu enfiah tawh niin, vawiin thlengin inhnukdawk duhte tan hun hawn a ni.