Meghalaya : TB umbo campaign ni 100 kalpui dawn

Meghalaya chuan tuberculosis (TB) umbo a nih theihna tura hma lakna - natna hriat chhuah, enkawl leh he natna a darh zel lohna campaign a neih chu ni 100 chhung a kalpui dawn.

Campaign hi National Health Mission hnuaia State Tuberculosis Office chuan World TB Day khan a khuh hawng a ni. Official-te chuan he hmalakna hi zau zawka inzirtina kalpuina tur leh, he natna avanga in enhranna tihtawpna tur a nih thu an sawi.

Health minister Wailadmiki Shylla chuan,TB umbo tur chuan healthcare worker-te mai bakah mi tinten inlungrual taka hma an lak a ngai a ni, a ti. State budget aṭanga 9% chu healthcare tan dah a nih thu sawiin, state chhunga mi pakhatin hriselna lama sum a hman zat chu Rs 7,800 a nih thu leh, hei hi ram pum average Rs 3,500 aiin a let hnihin a tam tih a tarlang.

Shylla chuan Shillong leh Tura-a medical college-ah doctor 200 vel dah belh an nih tur thu sawiin, primary leh community health centre-a doctor indaih lohna a sukiang dawn a ni, a ti.

Campaign-ah hian AI hmanrua leh portable X-ray system hman a ni dawn a, official-te chuan technology hman uar a nih zel avangin TB natna hmuh chhuah kawngah a pui nasa tih an sawi. Programme data-a tihchhuahah, TB diagnostic test 97% chu NAAT khawl bakah digital X-ray hmanga tih a ni tih an tarlang. Official-te chuan state chhunga khaw 1,258 chu TB vei awm lohna an ni tih an tarlang bawk.