Guwahati-a curfew puan hlip ta

Citizenship (Amendment) Act duh lohna lantirnaa tharum thawhna a thlen zui vanga Assam khawpui, Guwahati-a curfew puan chu nimin khan hlih a ni ta. December 11 aṭang khan Guwahati leh district ṭhenkhatah curfew hi puan a ni. 

Thawhṭanni khan chief minister Sarbananda Sonowal kaihhruaiin dan leh thupek awmdante thlirin buainain ziaawm lam a pan tawh avangin curfew hlih hi an rel a ni. Nimin zing dar 6 aṭang khan Guwahati-ah curfew hi hlih a ni a, mahse Dibugarh district-ah chuan curfew hi an la hlip lo a, zing dar 6 aṭangin darkar 14 chhung atan thlahdul a ni. 

District 10-a mobile internet service tihtawp erawh la chhunzawm zel a la ni thung. Curfew hlih a nih hnuah pawh CAA duh lohna lantirin nawrh hi huaihawt chhunzawm zel a la ni. Assam-ah hian nawrh huaihawtte leh police-te innawr buainaa police-te silai hmehpuah vangin mi panga in nunna an chan tawh. 

Kar liamtaa nawrh huaihawt vanga police-ten an man, RTI acitivist leh Krishak Mukti Sangam Samiti (KMSS) hotu Akhil Gogoi chu Jorhat aṭangin Guwahati-ah hruai a ni a, NIA court-ah a inlan. Gogoi hi Unlawful Activities Prevention Act hnuaiah thubuai siamsak a ni.