ILP resolution siam turin Meghalaya-in special session nei dawn

Meghalaya Assembly chuan an state-a Inner Line Permit (ILP) system hman a nih theihna tura sorkar laipui an ngenna resolution pass turin December 19 hian special session a nei dawn tih chief minister Conrad K. Sangma chuan a sawi. 

Sangma chuan Governor Tathagat Roy chuan special session neih a nih theihnan hian hma a la tih sawiin, session-ah hian Meghalaya state-a ILP system hmang tura sorkar laipui ngenna resolution an siam dawn tih a sawi a ni. 

CM Sangma ho hian kar liam ta Inrinni khan Meghalaya Democratic Alliance (MDA) palaite chuan union home minister Amit Shah an hmu a, an state-a ILP system hmantir ve turin an ngen a ni. Home minister hnenah hian ILP chungchang bakah an state in harsatna a neih hrang hrangte an thlen a, Amit Shah pawhin ṭha taka a lo dawnsawn thu CM chuan a sawi. 

Citizenship Amendment Act siam a nih dawn khan sorkar laipui chuan Manipur sorkar ngenna angin, December 11 khan Manipur-ah ILP system hman a phalsak a, President Ram Nath Kovind pawhin a  hming ziah hnan nghalin, Manipur-ah hian hman nghal a ni tawh a ni.