Arunachal : DSDE-in foreign languange training and placement programme hawng

Arunachal Pradesh-a department of skill development and entrepreneurship (DSDE) chuan, German leh Japanese ṭawng training leh placement programme a hawng. Batch hnihah hawngin, candidate 11 chu German ṭawng zirtirin, candidate 41 chu Japanese ṭawng zirtir an ni. German ṭawng zirna hi Hyderabad-ah neih niin, Japanese ṭawng zirna hi state khawpui Itanagar-ah neih a ni.

SDE secretary Bullo Mamu chuan, he hmalakna hi state ṭhalaiten Japan leh Germany-a hnathawh tur an hmun theihna atan buatsaih a nih thu a sawi. Training programme senso aṭanga 70% chu state sorkarin a tum sak a, visa processing, training fee, document translation, exam fee, medical expense, boarding leh lodging-te a huam. A bak 30% chu candidate-ten an tum thung.

Mamu chuan he skill training programme hi Arunachal Pradesh Budget 2026-27 zulzuia kalpui a nih thu sawiin, budget-ah hian tualchhung ṭhalaiten ram pawna hnathawh tur an hmuh theihna turin ṭawng zirna chu a dah pawimawh a ni, a ti. He hmalakna hmang hian ṭhalaite chu international market-a luh thei tura buatsaih leh, an thiamna tihhmasawn tum a ni. Japanese leh German ṭawng zirna programme batch dang chu kumin May thlaah kalpui leh tum a ni bawk.