Manipur : CM-in census dik leh langtlang tak neih a tiam

Manipur chief minister Yumnam Khemchand Singh chuan nimin March 27 khan, census dik leh langtlang taka kalpui a nih theihna turin state sorkarin hma a la dawn tih a sawi. Manipur University 15th Convocation Ceremony neih karlaka chanchinbu mite a kawmnaah, census neih tura zawhna awmte chhangin, census dik taka kalpui turin sorkarin theihtawp a chhuah tih a sawi.

Chhiarpui neih tur atana state mipuiten dan loa an state-a pem lutte hriatchhuah, National Register of Citizens (NRC) kalpui leh tualchhung buaina avanga chenna in leh lo chhuahsan, internally displaced persons (IDPs)-te relief camp aṭanga sawn chhuah phutin, census chu dik leh langtlang taka kalpui an ngen a ni. Tunhnai khan state sorkar chuan census leh a kaihhnawih dang neih hun tur hriattirna tichhuakin, Census 2027-a house listing chu kumin September 1 leh 30-ah neih a ni dawn tih a puang.

Ministry of Home Affairs-in hun tiam chhung a siam angin chhiarpui neih tur kalpui tur a ni a, hemi atana inbuatsaihna chu kumin August 17 leh 31-ah neih a ni ang. Census neih hmain sorkarin mipui thil phut tihhlawhtlin a ni dawn em tih zawhna chhangin, Chief Minister chuan a kaihhruai sorkarin dik taka kalpui a tum tiin a chhang a ni.