Meghalaya : Sorkar leh Jal Jeevan Mission-in MoU ziak

Meghalaya chief minister Conrad K Sangma chuan nimin March 27 khan, state sorkar leh National Jal Jeevan Mission-ten thawh dunna tur Memorandum of Understanding (MoU) an ziah chu virtual-a telpuiin, he inremna hmang hian state sorkarin chhungkaw tin hnenah tui in tur thianghlim pek a tum a ni.

MoU an ziah hmang hian state agency leh Central mission directorate inkarah thawh hona nghet zawk siamin, diktaka sum hman leh hun bituk chhunga an hmachhawp tihhlawhtlin a nih theihna turin hmalak a ni ang.

CM Sangma chuan state-in hmasawnna tam tak a nei tawh tih sawiin, thingtlanga chhungkaw 83% chuangin pipe hmangin tui supply an dawng tawh tih a sawi. Mission hi a hun taka zawhfel a nih theihna turin, sorkar laipui nen thawh hona ṭha an neih chhunzawm zel dawn tih a sawi bawk. An thawh hona chuan tui supply infrastructure tihchangtlun leh mipui khawsak tihhmasawn kawngah a pui dawn tih a tarlang.

Jal Jeevan Mission hi sorkar laipui chuan kum 2019 khan tlangzarhin, ram chhung hmun hrang hranga thingtlang khuaa tui thianghlim pekna tura ruahman a ni. Meghalaya chu he scheme hnuaia hmarchhak biala state-a thawk ṭha zingah a tel a ni.