Assam : Congress-in inthlan neih tur atana manifesto tlangzarh

Congress party chuan Assam assembly inthlan neih tur atana an party manifesto chu Pathianni khan an tlangzarh. Manifesto-ah hian thil lian tham tak panga tarlang telin, heng zingah hian hmeichhiate hnena ṭanpuina pawisa fai pek tur te, health insurance leh land rights pek an intiamnate a tel.

Party president Mallikarjun Kharge chuan Naoboicha-a vantlang inkhawm buatsaihah manifesto hi a tlangzarh a ni. Kharge chuan Congress-in sorkarna an chan chuan, state chhunga hmeichhiate chu sumdawnna bul ṭanna tur Rs 50,000 pek an nih bakah, hmeichhia zawng zawngte chuan thla tin an bank account-ah pawisa an dawng ṭhin dawn tih a sawi. An party chuan engmah phut let an nei dawn lo tih sawiin, BJP chuan pawisa hi pe ve tho mah se phut let neiin an ti a, BJP member nih kher a ngai a ni, a ti. Hetiang ang hian Congress chuan a ti ve dawn lo tih a sawi.

Kharge chuan chhungkaw tin tan cashless health insurance, Rs nuai 25 chin an siam dawn tih sawiin, Congress party sorkarna state - Rajasthan, Karnataka leh Telangana-ahte an tihhlawhtlin tawh thu a tarlang.

Sorkar lai, BJP sorkarin kumtina ram neitu nihna, land patta a pek chhuah thar zel ang chu an ti ve dawn lo tih sawiin, Congress chuan ram neitu nihna, ownership document hi ram leilung fa dik takte hnenah permanent-in a pe dawn tih Kharge chuan a sawi bawk. Karnataka-ah pawh hetiang hi an lo kalpui tawh a, mi 680,000 hnenah ram neitu nihna hi an pe tawh tih a sawi.

Congress party chuan an sorkar a nih chuan state chhunga kum upa zawk, senior citizen zawng zawng chu thla tin Rs 1,250 pek ziah a tiam bawk. Kharge chuan an manifesto chuan mitin a huam tel vek a ni tiin, state leh khawtlang ṭhatna tura an party vote turin mipuite a sawm nghal bawk a ni.