Manipur : CM-in high-level review meeting kaihruai

Manipur chief minister Yumnam Khemchand Singh chuan March 29 khan Secretariat-ah high-level review meeting kaihruaiin, tunhnaia Ukhrul district-a buaina chhuak chungchangah impumkhatna, remna leh muanna bakah inrelbawlna chak zawka kalpui a ni dawn tih a sawi.

Meeting-ah hian BJP MLA-te chuan Chief Minister-in mipui ngaih pawimawh inrelbawlna kalpui leh, sorkar rintlak din chu chak zawka kalpui a nih chuan rah ṭha a chhuah dawn tih an tarlang. Mitin hnena hamṭhatna a thlen theihna tur hmasawnna programme hrang hrang hlawhtlinna leh nghawng a neih dante sawi ho a ni bawk. CM chuan impumkhatna, remna leh muanna bakah thawh hona ṭha neih pawimawhna tarlangin, party legislator-te inpekna a fak.

Review meeting hi Ukhrul district-a Pathiannia buaina chhuak denchhena neih niin, hemi chungchangah hian Chief Minister chuan Tangkhul Naga pawl leh khawtlang mipuite chu buaina titawp tur leh remna leh muanna vawng nung turin a ngen. Buaina chuan eng rah ṭha mah a chhuah lo tih sawiin, sorkarin a ngai thutak hle a ni, a ti. Kumin February thlaa Litan khuaa buaina chhuah hnuah tun hnaiah buaina hi chhuak lehin, Tangkhul leh Kuki pawl inkara buaina thleng vangin district huam chhungah internet service ni nga chhung tihtawp a lo ni tawh bawk. Official-te chuan boruakin ziaawm lam a pan theihna turin hma lak mek a nih thu an tarlang.