Nagaland : MP-in Kohima Medical College premier institution-a hlankai phut

Nagaland Lok Sabha MP, S Supongmeren Jamir chuan sorkar laipui hnenah All India Institute of Medical Sciences (AIIMS) emaw, Regional Institute of Medical Sciences (RIMS) emaw angin Kohima Medical College chu premier institution-a hlangkai turin a phut.

Jamir chuan Kohima Medical College chu state-a medical college hmasa ber a nih thu sawiin, a thil phut chu healthcare infrastructure thuam chakna tura hmalakna pawimawh tak a nih thu a sawi. College hi kum 2023 September thla khan hawn niin, zirlai 100 awm theihna a ni. College hmasawnna tarlangin, Jamir chuan zirlai lak theih zat tihpun a ṭul thute, medical facility thuam chak leh zirna leh research huang zauh a pawimawh tih a tarlang bawk.

College chu AIIMS emaw central institute anga hlankai a nih chuan, state mai bakah hmarchhak bial healthcare-ah hmasawnna a awm dawn tih a sawi. Healthcare service indaih tawk lohna a tihziaawm phah dawn tih tarlangin, inenkawlna ṭha zawk dawng tura state dang pan ngai a tihtlem dawn bakah, tualchhung ṭhalaite tan medical lam zirna leh eizawnna kawngah hun remchang a siamsak dawn tih Jamir chuan a sawi.