Meghalaya: Police-ten sakhaw hmun bulah beihpui thlak

Meghalaya-a East Khasi Hills police-te chuan mipui leh tualchhung stakeholder-te aṭanga complaint tam tak an dawn bawhzuiin, Inrinni khan state khawpui Shillong hmun hrang hranga sakhaw hmun leh a chhehvela nawhchizawrhna leh a kaihhnawih thil ṭha lo tih awm ṭhinte dap beihpui an thlak.

Police superintendent Vivek Syiem chuan, he beihpui thlakna hi mipui complaint vang chauh ni loin, state-a HIV vei an pung zel avanga kalpui a nih thu a sawi. Police team-te hi additional superintendent of police Ivan Diengdoh chuan kaihruaiin, deputy superintendent of police (WCC) Jyoti Wahlang bakah Sadar Police Station, Women Police Station leh Laitumkhrah Police Station aṭanga officers-in-charge-te leh East Khasi Hills district aṭanga police-te an tel.

Beihpui an thlaknaah hian nawhchizawrhna leh a kaihhnawiha inhnamhnawih mi 16 an man. An mi man zinga palite chu agent an ni. Police-te chuan Maruti Suzuki Drift Dzire car leh scooty pahnih an man bawk. Meghalaya Police Act hnuaiah thubuai ziah luh a ni.