Assam : BJP-in manifesto tlangzarh

Assam-a rorellai Bharatiya Janata Party (BJP) chuan nimin Thawhlehni khan kumin April 9-a assembly inthlan neih tur atana an pary manifesto an tlangzarh. Manifesto-a an hmalak tumna an tarlan zingah state aṭanga Bangladesh mi an rama thawn kir, Uniform Civil Code kalpui, tuilian thlen lohna state siam leh kum nga lo awm tur atan sorkar hna nuai hnih siamte a tel.

Manifesto tlangzarh zawhah chief minister Himanta Biswa Sarma chuan, term thumna atana BJP-in sorkarna an chang leh a nih chuan Immigrants Expulsion from Assam Act, 1950 hmangin district commissioner-te chu darkar 24 chhung dan loa state-a pem lutte an rama thawn kir theihna thuneihna a pe a dawn tih a sawi. He hmalakna hi ram dang aṭanga state-a dan loa pem luh tumte laka beihpui thlakna a ti chak dawn tih a tarlang.

CM Sarma chuan state pumah Uniform Civil Code hman a ni dawn tih sawiin, kum nga lo awm turah state chu tuilian thlen lohna hmunah siam a tiam bawk. Tuilianin harsatna a thlen ṭhin tihtawpna atan Rs vbc 18,000 chu sanction a nih thu a sawi. Sarma chuan kum nga chhungin sorkar hna nuai hnih siam a nih tur thu leh, ṭhalai nuai 10 tan entrepreneurship, start-up leh industrialisation buatsaih a ni dawn tih a tarlang. Prime minister Narendra Modi hmalakna one district, one product campaign zulzuiin district tinah medical college leh engineering college pakhat ṭheuh din a ni dawn tih a sawi. Kawng, rel, thlawhtheihna leh water transport thuam chakna atan Rs vbc nuai 5 dah a ni dawn tih a sawi bawk.

Sarma chuan 'Orunodoi' scheme hnuaia hmeichhia, thla tin Rs 1,250 pek ṭhin chu Rs 3,000 ah tihpun a ni dawn tih sawiin, thingpuife huana hnathawkte nitin hlawh Rs 500-ah tihpun a ni dawn a ni, a ti.