Nagaland : MSME ṭhanlenna atan high-level meeting nei

Nagaland sorkar leh sorkar laipuia official-te chuan Thawhṭanni khan, state khawpui Kohima-ah micro, small and medium enterprises (MSME) ṭhanlenna leh thuam chakna atan high-level coordination meeting an nei. Meeting hi Chief Secretary conference hall-ah neih a ni.

Union Ministry of Micro, Small and Medium Enterprises secretary, SCL Das chuan Nagaland-a MSME hmasawnna chak zawka kalpui a nih theihna atan department hrang hrang inremna leh thawh hona ngelnghet neih a ṭul thu a sawi. Meeting chu hmalakna kalpui dan endikna mai ni loin, inbiakna leh thawh hona platform a nih thu sawiin, sorkar laipui thlawpna chu state hmasawnna atana thil pawimawh ber a ni, a ti.

Das chuan Nagaland hmasawnna chu ram chhung economy ṭhanlenna atan a pawimawh thu leh, sorkar laipuiin thlawpna nasa tak a pek thu a sawi bawk. MSME chu sector emaw department pakhatah emaw chauh insawrbing loin, textile, food processing, steel leh electronic industry hrang hrang a huam tih a sawi. MSME Ministry joint secretary Mercy Epao chuan MSME chawikanna tura sorkar laipui hmathlir sawiin, enterprise tihhmasawn leh mitin huap hmasawnna thlen turin hmeichhia, kutkawih thiamna leh kut hnathawktute chawikan a pawimawh thu a sawi.