Assam : AASU-in petrol leh LPG man tihsan sawisel

Assam-a All Assam Students' Union (AASU) chuan premium petrol, commercial LPG leh damdawi man tihsan a nih avangin Ningani khan sorkar laipui an dem thu an sawi a, he thil hi mipui vantlang tan harsatna siamsakna a nih thu sawiin, thutlukna siam tawh chu sut leh turin an phut.

AASU chuan nitin mamawh man tihsan tura thutlukna siam a nih avangin mipui tan phurrit a thlen tiin an sawi. Zirlai pawl chuan sorkar laipui hmalakna chu mipui ngaihthahna a ni tiin, hetianga thutlukna siam hian chhungkaw budget a tichhe zual dawn tih an sawi bawk. AASU president Utpal Sarma leh general secretary Samiran Phukan chuan chhungkaw tam takin LPG cylinder lei tura harsatna an tawh mek laiin a man tihsan a ni a, mipui harsatna chhawk aiin sorkar laipui chuan premium petrol, commercial gas leh damdawi man a ti to ta zawk a ni, an ti.

Damdawi pawimawh ṭhenkhat man tih san chuan healthcare lamah nghawng ṭha lo a thlen thei dawn tih sawi bawkin, a bikin mi hnuaihnung leh khawsak harsa zawkte tan harsatna nasa tak a thlen dawn tih an sawi. Hetianga thil man tihsanna tura thutlukna siam tawh chu ngaihtuah ṭha leh turin sorkar laipui an ngen a ni.