Tripura : Jal Jeevan Mission project tihkhawtlai vangin mipui lungawi lo

Tripura-a Mungiakami Block hnuaia Nonachhara ADC khuaa chengte chuan, Jal Jeevan Mission hnuaia tui in tur project kalpui a nih aṭanga kum li dawn a liam hnuah pawh chhungkaw tam takin tui supply an la neih loh chhunzawm zel avangin lungawi lohna an lantir.

Project hi Atal Jal Jeevan Mission (Har Ghar Jal) hnuaia kalpui a ni a, pipeline network hmangin helai biala chengte tui in tur pekna tur a ni. Tualchhung mite chuan an khuaah tui tihthianghlimna tur sum tam tak senga siam a nih thu sawiin, infrastructure din ni mah se tui a awm loh thu an sawi. Khaw mipuite chuan project thawh ṭan a nihin ṭha taka kalpui a ni a, mahse a hnuah thawh zawm lohin a awm zui tih an tarlang. Pipeline chu chenna in eng emaw zatah dah an ni a, mahse tui supply a awm lo tih an sawi bawk.

Hetiang a nih avang hian tualchhung mite chuan, hmun hla zawka tuichhunchhuah leh hmun dang aṭangin tui in tur an lak thu an sawi. Project hun rei tak tihkhawtlai a nih tawh avangin harsatna lian tak a thlen tawh a, hriselna lamah pawh nghawng ṭha lo a nei tawh tih an tarlang. Mipuiten lungawi lohna an lantir nasat tawh avangin, tun hnai khan Mungiakami Block-a Indigenous People’s Front of Tripura-a Block Advisory Committee chairman Sunil Debbarman chuan project thawhna hmun a lo tlawh tawh a ni.

Hemi hnua chanchinbu mite a kawmnaah, project pawimawh tam tak chu kum eng emaw zat thawh zawm an ni tawh lo tih a sawi. Sum tam tak sen a ni tawh chung pawha mipui chhawr ṭangkai theih loha a la awm chhunzawm zel chu thuneituten an hna an thawh loh vang a nih thu a sawi. Debbarma chuan tui supply mai bakah, kawng, electric leh healthcare service pawh a ṭha lo hle a, mipuiin harsatna an tawk nasa hle tih a tarlang.