State pathumin Covid-19 vaccine dawng ve leh

Hmarchhak state pathum - Manipur, Tripura leh Sikkim-te chuan Nilaini khan Pune-a Serum Institute of India (SII) aṭanga Covid-19 vaccine, Covishield thawnchhuah chu a thawh khatna atan an dawng ve leh ta. Hemi hma, Thawhehni khan  Meghalaya leh Assam chuan vaccine hi an lo dawng tawh a ni. 

Manipur tan hian Covishield dose 54,000 thawn a ni a, chief minister N Biren Singh hoin state health official-te chuan Bir Tikendrajit International Airport-ah an lo dawngsawng a ni. CM Singh chuan  ram chhung hmun hrang hranga vaccine thawn chhuah a ni thei chu lawmawm a tih thu sawiin, prime minister Narendra Modi chungah lawmthu a sawi. Manipur state awmna chu kilkhawr hle mah se, PM Modi chuan an state chu ngai pawimawhin Covishield vaccine dose 54,000 an dawng nghal chu lawmawm a ti hle tih a sawi. 

Manipur hian vaccine pek chhuah thawh khatnaah hian state chhung health worker 8,476-te a pe dawn a, vaccine pek chhuahna tur hmun 10 pawh tihfel a ni tawh bawk. 

Sikkim pawhin Nilaini khan Covishield dose 12,500 a dawng. State immunisation  officer Dr Phumzay Denzongpa chuan vaccine pek chhuah thawh khatnaah healthcare worker 6,000 vel hnenah pek phawt a ni dawn tih a sawi. Healthcare worker hi 10,367 awm mah se, vaccine hi mi pakhat hnenah dose hnih, ni 28 kar danah pek a ngaih dawn avangin healthcare worker-te chu a thawh khatnaah hian pek vek theih an ni dawn rih lo tih a sawi a ni. 

Tripura state tana Nilaini vek khan Agartala-a MBB airport-ah Covishield vaccine phurh thlen a ni. 

Tripura National Health Mission (NHM) director Dr Siddharth Shiv Jaiswal chuan a thawh khatnaah hian Covishield dose 56,500 an dawng tih sawiin, airport aṭang hian Gurkhabasti-a Agartala state storeshouse-ah lain dahṭhat nghal a ni, a ti. Nilaini tlai khan vaccine van hmangin district pariat  headquarters-ah heng vaccine te hi sem darh nghal a ni tih a sawi bawk. 

January 16 aṭanga vaccine pek chhuah turah Tripura chuan immunisation centre 15 a siam tawh a, a thawh khatnaah hian healthcare worker 45,420 pek an ni dawn a, vaccine pek thawk khatnaah hian journalist-te telh an ni dawn bawk. A thawh hnihnaah frontline worker - police, armed force, municipal worker-te pek an ni leh ang.