Tripura HC-in TTAADC inthlan buatsaih rang turin sorkar ngen

Tripura High court chuan state sorkar leh election thuneitute hnenah Tripura Tribal Areas Autonomous Dis­trict Council (TTAADC)  inthlan chu a rang thei anga buatsaih turin a ngen. 

Nilainia public interest litigation (PIL) thehluh a ngaihtuahnaah, chief justice Akil Kureshi leh justice Satya Gopal Chattopadhyay awmna division bench chuan state sorkar leh state election commission chu hun tikhawtlai loa inthlan neihna tur chungchanga buaipui  ngaite a ṭul anga bawhzui rang turin a ngen a ni. 

Kum nga term, TTA­ADC hi nikum May 17 khan a term a zo tawh a, term zawh tukah hian state sorkar chuan thla ruk atan Governor's rule puangin IAS officer pension tawh chu Adminstrator atan a dah a ni. Governor's rule hi a zawh hnuah pawh nikum November 17 khan thla ruk dang atan a pawtsei leh a ni. 

Eptu party, TTAADC term liam taa thuneihna changtu, Communist Party of India-Marxist bakah Congress party chuan BJP kaihhruai state sorkar chu Covid-19 hri leng chhuanlama hmanga a hun taka inthlan bautsaih duh lohah puhin, na takin an sawisel thung.