Manipur : CM-in Inter-State Truck Terminus tlawh

Manipur chief minister Yumnam Khemchand Singh chuan Jiribam-a Lakhipur-a Inter-State truck terminus chu nimin Pathianni khan tlawhin, infrastructure leh terminus kalpui dan a endik. Facility-te uluk taka endikin, rintlak taka hman chhunzawm zel a nih theihna turin thawm ṭhat ngai lai turte a enfiah bawk.

A Facebook page-a thuchhuah a siamah, CM chuan terminus hi helai biala bungraw phurhna atan a pawimawh hle tih a sawi a, terminus tihchak leh infrastructure a hun taka thuam chak a nih chuan sumdawnna kawnga hmalakna nasa takin a tichak dawn a ni, a ti. Hnathawh tur a siam dawn a, sum lamah hmasawnna ngelnghet leh district tan hmasawnna leh intluktlanna a thlen dawn tih a tarlang.

Thuthar lakhawmtute a kawmnaah, Chief Minister chuan khawtlang tinin remna leh muanna a awm an duh a, inrintawn lohna awmte chu tihtawp a ṭul tih a sawi. State-ah remna leh muanna siam chu a thil tum ber a ni tih tarlangin, a kaihhruai sorkar chuan Jiribam hmasawnna turin theihtawp a chhuah zel dawn tih a sawi bawk. CM chuan Jiribam chu community hrang hrang aiawhte chu kum 2023, May 3-a state-a hnam leh hnam inkara buaina a chhuah aṭanga chaw chhun ei ho hmasa ber an nih thu a sawi. Khemchand chuan Town Planning Department nen inrawnkhawmin, Inter-State Truck Terminus-ah hian tourism project dang thawh theih dan tur a zirchiang dawn tih a sawi.