Meghalaya : SIR kalpui turin inpuahchah

Meghalaya chu electoral roll ennawnna, Special Intensive Revision (SIR) kalpui turin a inpuahchah a, Election Commission of India-in kalpui ṭan hun tur a tihchhuah an nghak mek niin senior official chuan a sawi. Chief electoral officer Brahma Deo Ram Tiwari chuan SIR hi assembly bial 60-ah kalpui a ni dawn tih a sawi. SIR-ah hian chenna in tlawhin voter list an endik dawn a ni.

SIR kalpuina hmang hian official-te chuan pianna hmun leh document dangte chipchiar zawkin an endik dawn a, khua leh tui ni lote voter list aṭangin an paih chhuak dawn a ni. Civil society pawl hrang hrangte chuan SIR kalpui tur hian an nawr nasa hle a, Garo Hills Autonomous District Council (GHADC) inthlan neih tur atan a pawimawh tih an tarlang. March thlaa Garo Hills-a buaina a chhuah hnuah Confederation of Meghalaya Social Organizations (CoMSO) chuan a rang lama electoral roll endik turin an ngen bawk.

CoMSO chuan union home minister Amit Shah leh chief election commissioner, Gyanesh Kumar-te hnenah lehkha thawnin, voter list-ah hian India khua leh tui dik tak chauh an awm theihna tur leh, khua leh tuite hamṭhatna venhim a nih theihna tura hmalak a ngen. Chief minister Conrad K Sangma pawhin SIR kalpui chu a thlawp tih tarlangin, state sorkar chuan sorkar laipui leh Election Commission nen thawh hona ṭha tak an nei tih a sawi.

Booth Level Officer (BLO) te chuan chenna in hrang hrangah voter-te an enfiah dawn a, kum 2005-a electoral roll-ah an hming emaw, an nu leh pate hming emaw a lan leh lan loh azirin category paliah ṭhen an ni ang. Category tinah hian voter list-a awm theihna tur finfiahna document thehluh a ngai dawn a ni.