Dan loa lutte thurualpui dapchhuah nan Assam sorkarin committee a din thar

Assam sorkar chuan an state chhunga dan loa pem lutte thurualpui a, international border an kan theihna tura lo pui ṭhinte hremna pek an nih theihna turin heng mite dapchhuah hna thawk turin member panga awmna committee a din. 

Special Director-General of Police (Border) Mukesh Agrawal chuan state chief secretary Jishnu Barua nen hemi chungchang hi an sawidun hnuah committe hi din a nih thu a sawi. Committee hi Kokrajhar district-a 7th Assam Police Battalion commandant, IPS officer Subhrajyoti Borah-a'n a ho a ni. 

Deputy Inspector of Police (Ranges) te chuan committee hna thawk dan hi an enpui ṭhin dawn a, an range chhungah a ṭul angin hma an la zui bawk ang. Assam assembly in­thlan hi kumin April-May vel hian neih a ni dawn a, hei vang hian venhimna lam pawh uluk taka kalpui a ni. State sorkar chuan ramria venhimna ṭha zawk kalpui a nih theihna turin infrastructure tih­changtlunna leh thil ṭul dang atan tun hnaiah cheng vaibelchhe 100 a sanction. 

Official chuan police station tihchangtlunna tur, MOITRE scheme zulzuiin state sorkar chuan Border Outpost (BOP) infrastructure thuam ṭhatna tur scheme a siam dawn tih a sawi a, hemi atan hian Rs vcb 100 hi ruahman a ni, a ti. 

International border kaltlanga dan loa Assam-a lut ṭhinte danna atan India-Bangladesh border khar chu thil pawimawh a ni tiin, hemi atan hian ramri hi hung a nih thu a sawi bawk. Km 263-a thui, India-Bangladesh international border hi Border Security Force (BSF) ten an veng a, kum 267-a thui Indo-Bhutan international border chu Sashastra Seema Bal (SSB) ten an veng thung.