Arunachal : SC-in CM contract pek dan chhui chianna nei turin thupek chhuah

Supreme Court chuan nimin, April 6 khan Arunachal Pradesh chief minister, Pema Khandu chhung hnaivai company hnenah dik lo taka public contract pek a ni tih sawi awm chungchangah Central Bureau of Investigation (CBI) chu chhui chianna nei turin a hriattir.

Court chuan CBI chu independent-a chhui zuina neih a ṭul dawn em tih hre turin kar 16 chhunga report theh lut turin a hriattir. Nikum January 1 aṭanga December 31 thlenga contract pek chhuahte enfiah turin CBI chu a hriattir a, hemi chhunga mi ni lote erawh an en tel dawn lo.

Justice Vikram Nath, justice Sandeep Mehta leh justice NV Anjaria-te awmna bench chuan Save Mon Region Federation leh Voluntary Arunachal Senaa-ten petition an theh luh hmangin thupek hi an tichhuak a ni. Petitioner-te tan senior advocate Prashant Bhushan a inlan a ni. Court chuan state sorkar leh department chu CBI thawhpuina ṭha nei turin a hriattir a, record kaihhnawihte chu kar li chhunga peihfel turin an hriattir.

State Chief Secretary chu CBI thawhpui a, kar khat chhung nodal officer atan ruat a ni ang. Petitioner-te chuan state-a contract leh tender chu kalphung pangngai zawm loin Chief Minister, a nupui, a nu leh a tupa nena inzawm firm-te hnenah pek a ni tih an tarlang. Bhushan chuan CM chhung hnaivaite hnenah contract hi Rs vbc 1,270 hu pek an ni tih a sawi bawk. Kum 10 chhung, kum 2015 January aṭanga kum 2025, December 31 thleng khan state-a contract inpek chungchangah dik tawk lo taka kalpuina, chhungkhat laina induhsakna leh open tender system ngaih pawimawh lohna nasa tak a awm tih an tarlang. Hemi chungchang hi CBI emaw, Special Investigation Team (SIT) emaw chhui tir turin an lo ngen tawh a ni.