Assam Cachar District-ah BJP tan Manipur CM campaign

Manipur chief minister Yumnam Khemchand Singh chuan Pathianni khan Assam assembly inthlan neih tur denchhenin, Cachar district-a BJP candidate tan a campaign. CM chuan BJP kaihhruai NDA sorkarin kum 10 liam ta chhunga state hmasawnna tam tak a thlen a ni tiin a fak zui bawk.

Rongpur-a campaign rally neihah, Singh chuan Assam hma hun atan voter-te chu party hmathlir thlawp turin a ngen. NDA sorkar chuan Assam-ah infrastructure, public welfare, economy chawikan leh inrelbawlnaah hmasawnna tam tak a thlen tawh tih a sawi. Hmasawnna kawnga hmalakna leh thutlukna siam kawngah leh, dan loa state-a pem lutte chungchang ngaihtuahnaah Assam chu hmarchhak bialah mai ni lo, ram pum huapa state hmasawn ber pawl a nih thu pungkhawmte hnenah a sawi.

State ṭhanlenna leh hmasawnna ngelnghet awm theihna tura NDA sorkar hmathlir thlawp tur leh, BJP thlang tling ngei turin mipuite a ngen a ni. Hemi hnuah Chief Minister chuan Hailakandi bial hnuaia Jaribon-ah campaign chhunzawm lehin, hmarchhak bial hmasawnna tel lo chuan ram chhungah hmasawnna a famkim a awm thei lo tih BJP chuan a ring nghet tlat tih a sawi.