Assam : Police-ten Pawan Khera chenna in dap

Assam police leh Delhi police ṭangkawp chuan, Assam chief minister Himanta Biswa Sarma nupuiin foreign passport pathum a nei nia puhtu, Delhi-a Congress hruaitu Pawan Khera laka FIR theh luh a nih tuk, nimin khan a chenna in an dap.

Police-te chuan Khera chenna in an dapnaah hian pawikhawihna lamhawi material hmuh a nih thu an sawi. Police-ten an dap lai hian Khera hi inah a awm lo a, CM Sarma chuan Congress hruaitu chu Hyderabad-ah a tlanchhia niin a sawi.

Congress party chuan police-te chet dan an dem thu an sawi a, party hruaitu Jairam Ramesh chuan hetianga an chetna chhanah Chief Minister a puh bawk. Congress hruaitu dang Pramod Tiwari pawhin Assam police-te chu FIR an ziah luh zawha an thu hriat angte an zawh hnuah an che chhuak chauh tur a ni, a ti.

Khera hian press conference-ah CM nupui Riniki Bhuyan Sharma-i'n foreign passport pathum a neih thu leh, Dubai-ah chenna in pahnih leh Wyomimg-ah a kaihhnawih company nen inzawmna an nei tih a sawi a ni. Hemi chungchangah hian CM Sarma chuan a nupui nen FIR an theh luh thu sawiin, thudik lo leh belhchian dawl lo thehdarh chu damchhung lungin tan thleng hremna pek theih a nih thu a sawi. Sarma chuan research an neihah, thudik loa an puhnate chu Pakistani social media group aṭanga an lak a ni tih an finfiah tawh tih a sawi bawk. CM nupui pawhin an puhna chu phuahchawp a nih thu leh, AI hmanga siam a ni tih a sawi ve bawk.