Nagaland : Mokokchung district-ah curfew puang

Nagaland-a April 9-a Koridang seat-a by-election neih tur kaihhnawiha buaina chhuakah, April 6 khan BJP thlawptu pakhat a thi a, he thil thleng vang hian thuneitute chuan Mokokchung district hmun ṭhenkhatah curfew an puang.

Nunna chan hi Imrongsungba Imchen, Longkhum khuaa cheng niin, Independent candidate Toshikaba leh BJP nominee Daochier I Imchen thlawptute inkara buaina chhuakah hliam na tak tuarin, Mokokchung District Hospital-a enkawl a nih hnuah Dimapur-ah sawn leh niin kalkawngah a hliam tuar loin a thi a ni. Police-te chuan he thil thleng kaihhnawihah hian mi 16 man an nih tawh thu leh, chhuizuina neih mek a nih thu an sawi.

District magistrate Ajit Kumar chuan buaina chhuak chhunzawm tur venna atan, Bharatiya Nagarik Suraksha Sanhita Section 163 hnuaiah curfew puangin, he curfew hian Longkhum, Mangmetong leh Alichen huam chhung bakah 2nd NAP camp a huam a ni. Curfew puanna hmunah hian zan dar 6 aṭanga zing dar 5 thleng mi panga aia tam punkhawm khap a ni. Thuneitute chuan thupek zawm lote chu hrem an ni zel dawn tih an sawi a, curfew hi thuthar dang awm hma chu kalpui a nih tur thu an sawi bawk.

By-election hi nikum November thlaa helai bialtu BJP MLA Imkong L Imchen thih avanga neih tur a ni. He seat-ah hian candidate paruk awmin, chung zingah chuan Congress aṭangin T Chalukumba Ao leh NPP aṭangin I Abenjang-te an tel a, result hi May 4-a puan tura ruahman a ni.