Nagaland : Assam Rifles DG-in Governor leh CM hmu

Assam Rifles director general, Vikas Lakhera chuan Thawhlehni khan Nagaland state khawpui, Kohima-ah governor Nand Kishore Yadav leh chief minister Neiphiu Rio-te hmuin, mipui leh sipai inkar bakah Assam Rifles leh state inrelbawlna kawnga thawh hona ṭha neih pawimawhna an sawi ho tih defence thuchhuah chuan a tarlang.

Meeting-ah hian Lakhera chuan sipaite inralrin dan, ramri huam chhunga hmasawnna kawnga hmalakna leh mipui vantlang tana Assam Rifles-ten progamme hrang hrang buatsaih an tum dan a sawilang. Governor leh Chief Minister chuan hmasawnna ngelnghet awm theihna tura thawh hona, khuarel chhiatna laka invenna leh ṭhalaite thuam chak pawimawhna an sawi. Assam Rifles-ten hmun hla leh tlawhpawh harsaa venhimna, hmasawnna leh mipui hamṭhatna tur an buatsaih ṭhin avangin lawmthu an sawi bawk a ni.

Lakhera hian Thawhṭanni khan Dimapur-a 6 Sector Assam Rifles headquarters tlawhin, training leh inrelbawlna an kalpui dante a endik bawk. He hunah hian venhimna kalpui dan hrilhin, Dimapur leh a chhehvel huam chhunga socio-politics hmasawnnate an sawi. DG chuan he sector hnuaia hmalakna an neihte endikin, venhimna kawnga harsatna thleng thei hrang hrang laka an inbuatsaih dante an thlir let.