Assam : Assembly inthlan neih a ni

Assam assembly inthlan chu nimin, Ningani khan neih a ni. Vote thlak hi thawh khata neih niin, zing dar 7 aṭanga tlai dar 5 thleng hun hawn a ni. State puma polling station-ah zing kar aṭangin vote thlak tur an intlar thui hle. May 4-ah vote chhiarin result puan nghal a ni ang.

Seat 126 awmna, Assam Legislative assembly inthlanah hian candidate 722 awmin, independent candidate 258 an awm tel. Rorellai Bharatiya Janata Party (BJP) chuan term thumna atan sorkarna siam leh ngei an tum. Hetih lai hian epty party lian ber,, Congress chuan kum 2016-a sorkarna chhuhsak an nih hnuah hnehna chan tumin ṭan an la ve bawk a ni.

Vote nei mi vbc 2.50 vel awmin, an zingah hmeichhia vbc 1.25 leh third gender 318 an awm. Vote thlakna tur polling station 31,490 siam a ni bawk.

Candidate langsar tak tak zingah chief minister ni lai Himanta Biswa Sarma, Congress state president Gaurav Gogoi, assembly speaker Biswajit Daimary, leader of opposition Debrata Saikia, AIUDF hruaitu Badruddin Ajmal, Raijol Dal president Akhil Gogoi leh AJP hruaitu Lurinjyoti Gogoi-te an tel. Cabinet minister eng emaw zat an awm bawk a, chungte chu Atul Bora leh Keshab Mahanta bakah Charan Bore-te an ni.

Party zingah chuan Congress chuan candidate nei tam berin candidate 99 an nei a, BJP-in 90, AIUDF-in 30, BJP-in NDA hnuaia a thawhpui AGP leh BPF chuan seat 11-ah candidate 26 an nei bawk. Raijor Dal party chuan seat 13-ah in candidate in, AJP seat 10, CPI(M)-in 3 leh APHLC-in 2 ah an chuh bawk. AAP leh UPPL-te chuan seat 18 chuhin, TMC in 22, JMM in 16 bakah, Rorellai NDA hnuaiah BJP, AGP leh BPF te an thawk ho a, eptu party-te hi Congress, Raijol Dal, AJP, CPI(M), APHLC leh CPI(ML) te an ni.