Arunachal : Cabinet-in hydro-electric project pahnih thawh tur pawm

Arunachal Pradesh-a hydro-electric power thuam chakna turin, Cabinet Committee on Economics Affairs (CCEA) chuan hydro-electric project pahnih thawhna tur a pawm. Project thawh turte hi Rs vbc 26,069.5 senna tur Kamala Hydro Electric project leh Rs vbc 14,105.83 senna tur Kalai-II hydro-electric project an ni. A vaia sum sen tur zat chu Rs vbc 40,176 a ni.

Kamala Hydro-electric project hi MW 1,720 pe chhuak thei tura duan niin, kum khat chhungin energy unit mtd 6,870 a siam chhuak thei dawn a ni. Project hian Kamle, Kra Daadi leh Kurung Kumey district a huam dawn a, kum riat chhunga peihfel hman tura ruahman a ni. State enkawl National Hydroelectric Power Corporation (NHPC) leh state sorkar ṭangkawpin an thawk ang.

Kalai-II hydro-electric project chu MW 1,200 pe thei tura duan a ni a, kumtin energy unit mtd 4,852.95 a siam chhuak thei dawn a ni. Anjaw district-a Lohit basin-a hydro project thawh mek pawh kum ruk leh a chanve velah peihfel tura ruahman a ni. Project hi mini-ratna THDC India Ltd leh state sorkar kalpui a ni. Project pahnih aṭang hian Arunachal Pradesh chuan power siam chhuah 12% a thlawnin a dawng dawn a, 1% chu Local Area Development Fund (LADF) atan ruahman a ni bawk.