Meghalaya : Sorkarin Umiam Lake Island-a structure sak khap

Meghalaya sorkar chuan Umiam Lake-a Lumpongdeng Island-ah tourism project siam tura rawtna awm chu environment pawl hrang hrangin duh lohna an lantir hnuah permanent structure sak khap a nih thu a sawi. Chief minister Conrad K Sangma chuan he thu Ningani khan sawiin, mipui lungawi lo chuan project pawh cancel nghal an phut a ni.

Island-ah ram acre 36-a zauah tourism project siam rawtna a awm a, he thil hi Tata Group Indian Hotel Company Limited (IHCL) nena inzawm nia sawi a ni bawk. Activist-te chuan he project hian helai thliarkar ecosystem a tichhe dawn tih an sawi a, sava pemkhawmte chenna hmun a nih thu an sawi bawk.

CM Sangma chuan sorkar leh tourism department chuan he thliarkarah hian permanent structure sak khap a nih theihna turin inremna an siam tawh tih a sawi. Thliarkarah hian puan in, pandal leh stall-te chu kar khat emaw ni 10 chhung atan chauh sak phal a ni. Chief Minister chuan sorkarin chenna leilung leh a chhehvel tana pawi thei chu he island-ah hian sak a khap tih a sawi.

Green-Tech Foundation (GTF) chuan state secretariat bulah project cancel a nih theihna atan chaw ngheiin lungawi lohna an lantir mek bawk. Sorkarin project hi a cancel hma loh chuan chaw ngheia lungawi lohna lantir chhunzawm zel an tum tih an an tarlang.