Assam : Assembly inthlanah vote 85.21% a tla

Assam assembly inthlan Ningani, April 9-a neih zawh taka vote tla 85.21% a tling a, kum 2021 inthlana 82.04% a khum tih official-te chuan an sawi. Seat 126 awmna Assam Legislative assembly inthlanah hian district 35-a polling station 31,490-ah zing dar 7 aṭanga tlai dar 5 thleng vote thlak a ni.

Inthlan hi thawh khata neih a ni a, candidate 722 awmin, rorellai BJP kaihhruai NDA leh eptu pawl lian ber Congress chu a inel berte an ni. Chief minister Himanta Biswa Sarma chu a bial Jalukbari-ah ding lehin, Kamrup (Metro) district-ah a nupui Riniki Bhuyan Sharma leh a fate nen vote an thlak. State Congress president Gaurav Gogoi chu a nuin ṭawiawmin, Jorhat-a DCB LP School-ah vote an thlak thung.

Assembly inthlan kaihhnawiha buaina chhuakah mi 30 velin hliam an tuar a, mi pasarih man an ni tih official-te chuan an sawi. Polling station-a vote thlak kalpui dan video social media-a thehdarh a nih chungchangah Karbi Anglong district thuneitute chuan Ningani khan police hnenah complaint an theh lut bawk. Video hi Diphu biala polling station chhunga lak a ni a, Representation of the People Act, 1951 hnuaiah FIR theh luh a ni.