Nagaland : NSDMA-in Nagaland State Disaster Management plan tlangzarh

Nagaland Home Department hnuaia Nagaland State Disaster Management Authority (NSDMA) chuan, 14th Nagaland Legislative Assembly (NLA) session vawi riatnaa chief minister Neiphiu Rio-a'n a pharh Nagaland State Disaster Management Plan a tlangzarh.

Management plan tlangzarhah hian chenna leilunga chhiatna thleng, sik leh sa inthlak danglam, mihring pun chakna, hmun him loa mipui tam tak awmna leh infrastructure ṭhat tawk loh avanga chhiatna thleng pung zel tarlan a ni. Plan executive summary-a tarlan angin, state sorkar chuan chhiatna nasa thlen thei a pholan zingah lirnghing, leimin, tuilian, kangmei leh ruahtui tlak tlem avanga harsatna bakah mihringin a thlen ṭhin ramngawa kangmei chhuak, chemical lama chhiatna thleng leh gas kaihhnawiha thil thlengte pawh a tel.

Hetianga chhiatna thleng ṭhin laka hmalak a ṭul zia state sorkar chuan tarlangin, state machinery, district-a hnathawktu, NGO, stakeholder-te bakah, traditional village council-te chu khaw unit hrang hrang thlengin he hmalaknaa tel tur hian thawh ho a pawimawh thu an sawi. Ruahmanna an siamah state, district leh khaw level-a khuarel chhiatna a thlen changa inkaihhruai dan tur tarlan niin, khawtlang mipui an tel pawimawhna tarlan a ni bawk.