Manipur : Minister Govindas Konthoujam-a'n Amit Shah hmu

Manipur minister Govindas Konthoujam chuan April 12 Pathianni khan New Delhi-ah union home minister Amit Shah hmuin, Manipur-a dan leh thupek dinhmun thlirletna an neih bakah, Bishnupur district-a Tronglaobi-a bomb hmanga inbeihna thleng chungchang an sawi dun bawk.

Official-te chuan meeting-ah hian state-a buaina chhuak mek leh a nghawngna hmuna boruak siamṭhat lehna tura hmalaknate an sawi dun tih an tarlang. Social media-a thuchhuah a siamah, Konthoujam chuan state-ah remna leh muanna a awm theihna turin Union Home Minister nen inbiakna hlawkthlak tak an neih thu leh, tun hnaia buaina chhuak avanga mipui venhimna chak zawka kalpui dan turte an sawi dun tih a tarlang. State-a dan leh thupek kenkawh kawngah leh hmasawnna tura sorkar laipuiin thlawpna a pek chhunzawm zel avangin Shah chu lawmthu a hrilh bawk.

Bishnupur district-a Tronglaobi-a bomb hmanga inbeihna thleng avanga naupang pahnih thihna thleng leh, a kaihhnawiha buaina chhuak zui avangin hruaitu pahnihte hian meeting hi an nei a ni. Inbeihna thleng avanga mipui thinrim chuan valley huam chhung hmun eng emaw zatah lungawi lohna an lantir chhunzawm zel a, pawikhawihtute man chhuah a, an phu ang hremna pek an phut a ni.

Buaina chhuak vang hian Imphal West, Imphal East, Bishnupur, Kakching leh Thoubal-ahte curfew puan chhunzawm a la ni a, mahse, Pathianni khan heng hmunah hian darkar 10 chhung chu mipuiten an mamawh an lamkhawmna turin thlahdul a ni. Buaina chhuak chhunzawm zel tur venna leh, thu dik tawk lo thehdarh tur venna atan mobile internet leh data service pawh tihtawp chhunzawm a la ni bawk.