Tripura : ADC inthlanah 83% vote tla

Tripura Tribal Areas Autonomous District Council (TTAADC) inthlan chu Pathianni khan zawhfel niin, vote 83% a tla. Inthlan hi zing dar 7 aṭanga tlai dar 5 thleng neih niin, inthlan boruak muanawm taka kalpui a ni tih official-te chuan an sawi.

Tripura State Election Commission secretary Anurag Sen chuan seat 28 awmna, TTAADC inthlan tlai dar 5-a zawhfel niin buaina lian tham vak lo chhuakte pawh police-ten an chingfel tih a sawi. Vote thlak hunlaiin EVM-ah harsatna an tawh loh thu a sawi bawk. Polling station Ṭhenkhatah vote thlak an tam avanga EVM khawl chiang lote chu rang taka thlak a ni, a ti.

State Election Commission chuan Sepahijala district-a Pekurjala-Janmejoynagar bial hnuaia polling station 17/39-ah ballot unit tihchhiat a ni tih complaint a awm avangin vote thlak nawn leh turin thupek a chhuah a, April 16-a vote an thlak ṭha dawn a ni.

TTAAD seat 28 ah hian candidate 173 an awm a, vote nei mi 9,62,697 an awm a ni. BJP, Tipra Motha leh Left Front-te chu party langsar te an ni a, BJP leh Tipra Motha hi National Democratic Alliance (NDA) member ni ve ve mah se, tun ṭum inthlanah hian a hranin an chuh a ni. Left party-ah hian Communist Party of India (Marxist), Forward Bloc, Communist Party of India (CPI), leh Revolutionary Socialist Party (India) an tel. Congress leh Indigenous People's Front of Tripura (IPFT) pawhin inthlan hi an chuh ve bawk.Vote thlakna pollling station hi 1,257 siam a ni. Vote tla hi April 17-ah chhiarin result puan nghal a ni ang.