Nagaland : Governor leh PHED official-ten meeting nei

Nagaland governor Nand Kishore Yadav leh, Public Health Engineering Department (PHED) chuan state khawpui Kohima-a Naga Bhavan Conference Hall, Lok Bhavan-ah Thawhṭanni khan meeting an nei.

Lok Bhavan thuchhuah chuan, PHED secretary Zarenthung Ezung kaihhruai PHED official-te chuan state-a tui supply leh thianghlimna kawnga hmalakna kalpui mekte Governor hi an hrilh a ni. Ram pum huap programme, Jal Jeevan Mission (JJM) leh Swachh Bharat Mission (Grameen) hnuaia hmasawnnate tarlan a ni bawk. Department chuan an state-ah chhungkua 94.91% in tui supply an nei tawh tih sawiin, kumin April 1 thleng khan JJM hnuaiah chhungkaw nuai 3.45 chuangin tui supply an nei tawh tih an tarlang.

District eng emaw zatah project hi hlawhtling taka kalpui a ni tawh a, block ṭhenkhatah Functional Household Tap Connections (FHTC) chu 100% zawhfel a ni tawh tih an sawi bawk. Official-te chuan state-a khaw 1,258 (88%) chu ODF Plus-a puan an nih thu sawiin, bawlhhlawh sawngbawl leh khawtlang faina lamah hmalakna nasa tak an neih thu an tarlang. District hrang hranga khawtlang kaihhruai tui supply system leh bawlhhlawh sawngbawl kawnga hmalaknate an sawi lang bawk a ni.

Governor chuan tui lakna tur tlakchham, fund leh enkawl zui kawnga harsatna an tawh chungchangte ngaithlain, a hun taka project kalpui leh khawtlang mipui nen thawh hona ṭha neih a pawimawh thu a sawi. Ruahtui khawl pawimawhna tarlangin, department chu state hmun hrang hrangah ruahtui khawl chawilar turin a hriattir bawk.