Assam : Bamboo-to-Biomethanol facility din dawn

Assam sorkar chuan India rama a hmasa ber tur, industrial-scale bamboo-to-biomethanol facility dinna tur a pawm. Project hi Rs vbc 10,000 senna tur niin, hemi hmang hian khawvel pum huapa fuel thianghlim leh intodelh tura hmalakna kawngah Assam chu hmahruaitu zingah a tel dawn a ni.

Project hi Novel Biofuels leh ACTUAL thawhpuinaa din tur a ni a, hman ṭan a nih hunah chuan facility hian tualchhung loneitute mau thar chhuah hmangin biomethanol quality ṭha nitin KLPD 1,400 (kiloliter per day) a siam chhuak thei dawn a ni. Facility hi kumina sak ṭan tura ruahman niin, kum 2030-ah peihfel hman tum a ni. Project hi ram chhunga energy thianghlim infrastructure dinna kawnga mellung pawimawh tak a ni dawn bawk. Hei bakah mau chin hian Brahmaputra Valley-a tuilian leh thlipui lakah venhimna a pe thei dawn a, sum lak luhna ngelnghet a siam bawk ang.

Facility chuan mau biomass chu high-purity biomethanol-ah a siam danglam thei dawn a, he thil hi maritime leh aviation sector tan a pawimawh dawn hle a ni. Project-ah hian state-a loneitute nen thawh ho a ni dawn a, supply chungchanga inremna an siam hmangin loneitute chu stakeholder-ah dah an ni dawn bawk.

He project hi energy siam chhuahna bakah chenna leilung venhimna atan a ṭangkai dawn hle a, mau zung chuan lei a tih ṭhat bakah ram leilung chhe tawhte a siam ṭha thei dawn a ni.