Arunachal : CM-in Siang district tihhmasawnna tur Rs vbc 196.44 tlangzarh

Arunachal Pradesh chief minister Pema Khandu chuan Thawhlehni khan Siang district-a Riga khuaah hmasawnna project hrang hrang thawhna tur Rs vbc 196.44 a tlangzarh. He sum hi helai bial infrastructure leh public service thuam chakna atan hman a ni ang.

Project hi sector hrang hrangah kalpui a ni dawn a, chung zingah chuan kawng, zirna, infrastructure leh public service-te an tel. Official-te chuan he hmalakna hi hmun hla leh tlawhpawh harsa bakah, district-a khawsak harsa zualten an chhawr ṭangkai dawn tih an sawi. Pungkhawm hmaa thu a sawiah, Khandu chuan Riga-a kawng inkalpawhna thawm ṭhat, circuit house thar sak leh Siang district tan sports stadium sak a nih tur thu a sawi.

Project eng emaw zat thawhna tur lungphum phum niin, chung zingah chuan Roga-a sorkar hnathawk awmna tur, Riga-a New Hiram-a community hall, Pangin-a women police station leh Pegging Botte-a cultural hall sakna tur pawh a tel. Zirna sector-ah Pangin-a Government Higher Secondary School (GHSS) Pangin, Government Secondary School (GSS), GSS Boleng leh Government Upper Primary School (GUPS)-a hostel, classroom, academic-cum-administrative block leh staff quarters project kalpuina tur puan a ni bawk.

Inkalpawhna project zingah Chief Minister’s Comprehensive State Road Development Programme (CMCSRDP-II) hnuaiah Boleng leh Pangin kawng siamṭhat a ni dawn a, Yibuk-Lising kawng (Phase I) leh Netaji Subhash Chandra Bose Awasiya Vidyalaya (NSCBAV)-a staff quarters leh infrastructure sak a ni bawk ang. Deen Dayal Upadhyaya Gram Jyoti Unnati Abhiyan (DAJGUA) hnuaiah khum 100 lenna hostel building pawh sak tur ruahman a ni.