Assam sorkarin Mobile internet titawp chhunzawm zel
Gauhati High Court-in Assam sorkar hnenah Thawhlehni tlai khan state chhungah mobile internet service chhunzawm tir tawh turin hriattir mah se, court thupek zawm loin BJP kaihhruai Assam sorkar chuan nimin thleng khan service hi a la tinung duh lo.
Citizenship (Amendment) Act duh lohna lantira nawrh huaihawtnaa tharum thawhna a thlen hnuah, sorkar chuan Guwahati leh state chhung hmun ṭhenkhatah curfew puangin, mobile internet service pawh a titawp zui a ni. Thawhlehni zing dar 6 aṭang khan curfew puan hi hlih ni mah se, mobile internet service erawh titawp chhunzawm a la ni thung.
State finance minister Himanta Biswa Sarma chuan Thawhlehni aṭang khan buaina chhuak thar a awm tawh lo tih sawiin, an state boruak pawh a pangngai chho leh ṭan tih a sawi. Chief Minister hoin police hotu leh civil administration official-te chuan tlai tinin state chhung dinhmun, dan leh thupek dinhmunte an ennawn ziah a, sorkar chuan mobile internet service tihtawp chhunzawm rih chu a rel a ni, a ti. Zirtawpnia boruak awmdan azira service tihnun leh tihnun loh tur hi ngaihtuah a ni ang, a ti.