Hmarchhakah Hindu-te minority status pek ni dawn lo

Supreme Court chuan hmar­chhak bial leh state dang ṭhenkhat, Hindu sakhua zuitute tlemna hmuna Hindu awmte  minority status pe tura ngenna chu a hnawlsak. 

Chief Justice of India SA Bobde kaihhruai judge pathum awmna, Supreme Court bench chuan state ṭhenkhata Hin­du awmte hamṭhatna leh humhalhna pe tura ngenna petition hi BJP hruaitu Ashwini Kumar Upadhyay thehluh a ni. Bench chuan sakhua chuan ramri a nei lo tih sawiin, India ram pum anga thlir tur a ni, a ti. Minority status pek chungchang court ngaihtuah tur ni loin, sorkar ngaihtuah tur a ni zawk thu a sawi bawk. 

Petition thehluttu, BJP hruai­tu hian sorkarin kum 26 chhung Parsi, Muslim, Kristian, Sikh leh Buddhist-te minority-a a puang chu a khing a ni. Mahse court chuan ṭawng (lan­g­uage)chu state a zirin khuah­khirhna siam theih a ni a, sakhua erawh chuan state ramri a nei ve lo, a ti. 

He petition ngaihtuah hma hian Attorney General KK Venugopal chu court hian a berawn tawh a, Hindu sakhua chu India ram state leh UT pariat-ah sakhaw tlem zawk an ni tih pawh hrilh a ni. Hindu sakhua zuitute tlemna chu Punjab, Mizoram, Nagaland, Meghalaya, Arunachal Pradesh, Manipur bakah UT pahnih, Jammu and Kashmir leh Laskhadweep te an ni.