Meghalaya : Tourism Department-in GTF nen inbiakna nei turin inhawng

Meghalaya Tourism Department chuan Lumpongdeng-a tourism project kalpuina tura buaina chhuak mek chungchangah, Green Tech Foundation (GTF) nen inbiakna nei turin an inhawng tih a sawi. Hetih lai hian GTF chuan an member-te laka FIR theh luh sut a nih hma chuan inbiakna neih an tum loh thu an sawi.

Tourism Minister-in Lumpongdeng-a tourism project kalpui tur a sawi chuan chenna leilung leh a chhehvel a tichhe thei dawn nia sawiin GTF hian an dodal a, buaina hi a chhuak zui a ni. Mahse, sorkar hruaitu zingah Chief Minister leh Deputy Chief Minister-te chuan permanent structure sak a ni dawn lo tih an sawi ve thung.

Buainain zual lam a pan zel avangin Ri Bhoi deputy commissioner hnenah thlen niin, GTF aiawh leh tualchhung Dorbar Shnong (Village Council) te nen inbiakna neih tura ruahmanna siam tura tih a ni. GTF chuan inbiakna neih chu duh lo mah se, khawtlang hruaitute nen hnathawh tur, eizawnna leh chenna leilung humhalh kawnga inbiak erawh an duh thung. Tualchhung mipui chuan tourism ngelnghet neih tumna leh, chenna leilung humhim bakah tourism tihchangtlunna atan herbal plantation hmalakna neih an rawt a ni.

Dorbar Shnong chu rawtna an neihte theh luh thuai tura beisei niin, hnathawh tur siam leh chenna leilung humhalh chu ngaih pawimawh ber a ni. Hetih mek lai hian GTF member-te chuan chaw ngheia nawrh an la chhunzawm zel a, an chairman chu a taksa a chau tawh hle nia sawi a ni. Tourism director chuan lungawi lohna an lantir chu titawp tur leh, inbiakna mumal neihpui turin a sawm.