Nagaland : Cosmetic lem nia rinhlelh zuar mi panga man

Nagaland khawpui, Kohima police-te chuan cosmetic leh beauty product lem nia rinhlelh zawrh leh hralh chungchangah an thudawn bawhzuiin dan angin mi panga an man.

Police-te chuan Razhu Point leh Y-Junction chhehvela dawr panga an endik a, brand lar tak tak hmanga dik lo taka hralh chhuah ṭhin cosmetic tam tham tak an man a, brand hming an hman zingah Lakme pawh a tel. North Police Station-ah North PS Case No. 0011/2026 hmangin Bharatiya Nyaya Sanhita (BNS), 2023 Section 318(4) hnuaiah thubuai ziahluh a ni.

He thubuai kaihhnawihah hian mi panga man niin judicial custody-ah dah an ni. Product lem siam leh hralh chhuahna network pawh chhuizui nghal a ni bawk. Police official-te chuan cosmetic lem hralh chu company property rights bawhchhiatna a nih bakah, hriselna lamah nghawng ṭha lo neiin consumer-te tan thil pawi tak a thlen thei tih an sawi. Police-te chuan mipuite chu cosmetic leh beauty product-te chu authorised seller hnen aṭang chauha lei tur leh, product an hman hmain uluk taka enfiah turin an ngen.

Mipui vantlang himna atan mipuite chu product lem hralh chhuah emaw, rinhlelhawm emaw a awm a nih chuan police station-ah thlen vat turin an hriattir. Dan phal loh thil tiluite chungah na taka hremna pek an ni dawn tih police-te chuan an sawi bawk.