Tripura : Dhalai district-a power office suasam

Tripura-a Dhalai district-a Ambassa subdivision-a Tripura State Electricity Corporation Limited (TSECL) chu tualchhung miten Nilaini zan khan suasamin, bungrua tihchhiat a nih bakah Ambassa Police Station aṭanga Officer-in-Charge-in hliam a tuar. He buaina hi high-voltage electric wire chenna ina a tlak avanga hmeichhe naupang kum 13 miin hliam na tak a tawrh avanga thleng a ni.

He thil thlengah hian Ambassa Sub-Divisional Magistrate (SDM) chuan Deputy General Manager (DGM) leh Ambassa TSECL Senior Manager te lakah show-cause notice a tichhuak. SDM chuan notice-ah hian Ambassa Sub-Division hnuaia a kaihhnawih department zawng zawngte chu an station chhuahsan lo tur leh chhiatna a thlen theih lakah uluk taka vil turin a hriattir. Hna thawk ṭha lo leh ngaihthahte chu Section 56, Disaster Management Act, 2005 hmanga hrem theih an ni tih tarlan a ni bawk.

Tripura police-te chuan Nilaini tlai dar 5 vel khan mipui thinrim chu Ambassa Market-ah an pungkhawm tih sawiin, National Highway dan an tum tih an sawi. An thudawn bawhzuiin buaina chhuahna hmunah hian police-te chu an kal nghal a ni. Police-te chuan chhuizuina an neihah Samakjit Modak-a chenna inchunga main line tla chuan a fanu kum 13 mi Monti Modak, inchunga infiam chu electric hian a man tih an sawi. Naupang hi Kulai Hospital-ah enkawl mek a ni.