Meghalaya : Orchid Lake Resort-ah Taj Umiam Resort sak kalpui dawn

Meghalaya sorkar chuan Orchid Lake Resort-a Taj Umiam Luxury Resort and Spa sak chu kalpui tlang a ni dawn tih a puang. Green-Tech Foundation (GTF)-in lungawi lohna an lantir hnuah, sorkar chuan Lumpongdeng thliarkar chu permanent structure sakna atan hman a ni dawn lo tih a sawi a ni. Official-te chuan he thliarkara nungchate chenna chu humhalh a ni dawn tih an sawi bawk.

Chief minister Conrad K. Sangma chuan project chungchang kimchang leh, mipui ngaihdan hrang hrang sawi hona tur white paper pawh tihchhuah thuai a nih tur thu a sawi. Tourism director Brenda L. Pakyntein chuan environment humhalh chu ngaih pawimawh ber a nih thu sawiin, project chuan dan a zawm dawn tih a sawi. Dan zawm a nih leh nih loh uluk taka enfiah a nih tur thu leh, dan bawhchhiatna a awm a nih chuan project tihtawp a ni dawn tih a sawi bawk. Project hmang hian tualchhung loneitute leh sangha mantuten direct-in hotel enkawltute nen insumdawn tawnna an nei thei dawn a ni, a ti.

Meghalaya State Pollution Control Board official-te chuan project thawktute chuan Consent to Establish (CTE) leh, Consent to Operate (CTO) an hmang dawn tih sawiin, an hnathawh dan uluk taka endik a ni dawn a, dan zawm loh a nih chuan a ṭul anga hma lak a ni dawn tih an sawi bawk. Sorkar chuan state-ah khualzin an pung zel tih sawiin, tourism infrastructure thuam chak a ṭul a, hei bakah project chuan hnathawh tur a siam dawn tih a sawi bawk a ni.