Arunachal : Namsai leh Dirang-ah science centre din dawn

Arunachal Pradesh chief minister Pema Khandu chuan Namsai leh Dirang-ah zirlaite hnena science lam zirna chawikanna atan science centre thar planetarium awm telna din a ni dawn tih a sawi. He thu hi Inrinnia Dera Natung Government College-a facility thar pathum hawnna inkhawmah a sawi.

CM Khandu chuan state sorkarin infrastructure leh zirna in thuam chak turin theihtawpin hma a la chhunzawm zel tih a sawi. Namsai leh Dirang-a science centre sak turah planetarium dah tel a ni dawn tih sawiin, zirlaite chuan science leh astronomy-ah tuina an neih a beisei tih a tarlang.

Chief Minister chuan science centre sak turah chuan digital planetarium, sky simulation system leh interactive exhibit hmanraw ṭha leh changkang hman a ni dawn tih a sawi. He hmalakna hian zirlaite leh ṭhalaite chu science, astronomy leh thil thar hmuh chhuahte an zirchiang thei dawn a ni, a ti. Khandu chuan hydropower, MSME, startup leh entrepreneurship chungchang pawh sawilangin, thiamna tihpun a pawimawh thu a sawi bawk. Deen Dayal Upadhyaya Swavalamban Yojana, startup support programme-te leh Arunachal Pradesh Investment and Innovation Park-te chu state-a thil thar hmuh chhuah leh eizawnna siam kawnga puihbawmna petu pawimawh tak a nih thu a sawi bawk a ni.