Assam : MGNREGS hna nuai 4.5 chuang la thawk zo lo

Assam-a Mahatma Gandhi National Rural Employment Guarantee Scheme (MGNREGS) hnuaia hna thawh tur nuai 4.5 chuang chu kumin April thla thleng khan thawh zawh a la ni lo tih Rural development department data chuan a tarlang.

Job-card neitute pawh financial year, 2025-26 chhungin scheme hnuaiah hian hnathawh tur mumal pek an ni lo bawk. Sorkar laipui MGNREGS dashboard tarlan danin, Assam district hmun hrang hranga hna thawh 4,50,785 chu zawhfel a la ni lo. Hnathawh zawh loh hi Nagaon-ah tam berin, 31,124 a awm a, Chachar-ah 23,424, Barpeta-ah 22,591 leh Kamrup-ah 20,908 te an ni. District danga hna thawh zawh lohna chu Golaghat (20,035), Kokrajhar (19,259), Morigaon (17,886), Karbi Anglong (15,362), Tinsukia (14,499) leh Tumulpur (14,069) te an ni.

Hna thawh zawh loh 4,50,785 zinga 4,41,096 atan hian nikum chhung khan sum sen engmah a awm lo a, hei hian hna thawh tihkhawtlai ni loin thawh a ni lo hrim hrim nia a lan thu tarlan a ni. MGNREGS hnuaiah thingtlang lam mite pualin, job-card neite tana ni 100 chhung inhlawhna tur siamsak ṭhin an ni. Mahse Assam-ah chuan kum eng emaw chen aṭang khan hna thawh tur siam zat hi a tlahniam zel a, kum 2025-26 chhunga ni 100 chhung inhlawhna siamsakte chu state pumah chhungkaw 7,237 chauh an ni. Hei vang hian thingtlang lam khawsak chawikanna tura ruahman scheme hnuaiah hian mi tam takin hamṭhatna an hmu lo a ni.