Manipur : Imphal West district-a buaina chhuakah mi 21 man tawh

Manipur-a Bishnupur district-a Tronglaobi khua bomb hmanga beih a nih avanga naupang pahnih an thih chungchangah April 18 khan Imphal West district-ah lungawi lohna lantir niin buaina a chhuak leh. Buaina chhuaka inhnamhnawih mi 21 man an ni tawh tih nimin Thawhṭanni khan police-te chuan an sawi. Nawrh huaihawtte hian security-te lirthei chu lung hmanga an vawm bakah, petrol bomb hman a nih bawk avangin security force, 232 Battalion CRPF zinga mi pathum an hliam a ni.

Bomb hmanga beih vanga naupang pahnih thihna thleng duh lohna lantirin CSOs (civil society organisations) hrang hrangin April 18 khan Imphal Jiribam road-ah torch rally an huaihawt a ni. Patsoi aṭanga Sagolband pana kawng an zawhnaah buaina chhuakin mi eng emaw zatin hliam an tuar. He thila inhnamhnawih Imphal East mi pakhat man a ni tawh bawk. Police-te chuan buaina siam tum emaw remna leh muanna tichhe thei zawnga chet lak tumte chu na taka hrem an ni dawn tih an sawi.

Lungawi lohna kawng zawh hi Imphal East district-a Koirengei leh Hatta Golpati bakah, Imphal West district-a Kakching leh Mayai Lambi-ah neih a ni bawk. Imphal West-a Uripok, Imphal East-a Khabam Lamkhai leh Koirengei leh Kakching-ah security force-te nen an intibuai nia sawi a ni. Heng district-a hmun eng emaw zatah security force-te chuan mipui pungkhawm hnawh darhna atan tear gas an hmang a ni.