Nagaland: Government law college awm loh vangin sorkar sawisel

Nagaland-a National People’s Youth Front (NPYF), Dimapur District chuan an state-ah government law college a awm loh avangin sorkar chu na taka sawiselin, a ngaihthah vangah an puh.

Thawhṭannia press release an tihchhuahah, National People's Party (NPP) youth wing chuan kum 1963-a Nagaland chu state-a hlankai a nih aṭanga kum 60 hnuah pawh sorkar enkawl law college infrastructure a la awm lo tih an tarlang. Hei hi sorkar hmasa ho leh, tuna sorkar lai mek pawhin an ngaihsak loh vang a ni tih an sawi.

NPYF chuan kumtina state budget chu cheng vaibelchhe chuang ni mah se, government law college dinna tur hian langtlang leh time-bound policy-a inpekna a awm lo a, law college din chuan ngaih pawimawh a hlawh ngai lo a ni, an ti. Tun dinhmunah state-ah hian dan lam zirna chu Nagaland University leh a kaihhnawih institution hnuaiah tlemte a awm tih sawiin, fund leh autonomy a awm lo tih an sawi bawk.

Dan lam zirna institution a awm loh avangin zirlai, a bik takin khawsak harsa zawkte chuan state pawn an pan a ngai ṭhin a, hei hian sum leh paiah phurrit nasa tak a thlen a ni, an ti. NPYF chuan Article 21 hnuaiah zirna ti hmasawn turin state-in mawhphurhna a nei tih an tarlang a, sorkar chu a rang lama government law college din turin an ngen. Hma lak a nih loh chuan ṭhalaiten an palzam mai mai tawh dawn lo tih an tarlang.