Meghalaya : Lumpongdeng thliarkara Umiam luxury resort sak tur titawp

Meghalaya sorkar chuan Lumpongdeng thliarkara Umiam-a five-star resort project kalpui a tum chu, Ri Bhoi district-a tualchhung pawl hrang hrang leh stakeholder-ten nasa taka an dodal avangin project chu tihtawp a ni tih an puang. Umiam Hotel Pvt Ltd nen inremna an siam pawh ngaihtuah ṭhat leh a ni ang.

He thutlukna hi sorkar aiawhte leh Synjuk Ki Rangbah Shnong (village head) te nen meeting an neih hnuah puan a ni. Thuneitute chuan he thliarkar hi project kalpuina tura telh a nih chungchangah mipuiin lungawi lohna an lantir chu ngai pawimawhin, buaina nasa zawk a thlen lohna turin sut a nih thu an sawi. Official-te chuan thliarkar chu project kalpuina tur zingah telh a nih tawh loh thu tarlangin, tourism project lian tham dang chu Umiam Orchid Lake Resort-ah kalpui a ni dawn tih an sawi. Resort project hi infrastructure awm sa, ram acre 30-a zauah kalpui a ni zawk ang.

Sorkarin Umiam-a project kalpui a tum duh loh lantir leh, project sut tura phutin pawl pakhat chuan kar hnih dawn chaw ngheiin lungawi lohna an lo lantir tawh a ni. Thuneitute chuan project chu an state tana tourism chawilarna tur a nih thu sawiin, permament structure pawh din a ni dawn lo tih an sawi. Mahse mipuiin nasa taka an dodal avangin thliarkarah hian project chu kalpui a ni dawn ta lo a ni.