Assam : Guwahati-ah April thlaa ruahtui tlak tam ber record siam

India Meteorological Department (IMD) chuan April 20 khan Guwahati-ah ni khat chhungin ruahtui mm 117.4 a tla tih tarlangin, hei hi kum 1951-a ruahtui tlak dan record ṭan a nih aṭanga April thlaa ni khata ruahtui tlak tam ber a ni tih an sawi. He record thar hian kum 2004-a mm 116.5 record a khum a ni.

April 20-a data tihchhuahah hian Guwahati leh a chhehvel hmun hrang hrangah ruah tui a tla tam hle a, Guwahati (City) ARG-ah mm 126.5, AAU-HRS-ah mm 119.5, Gauhati University-ah mm 134, leh SIRD Complex, Khanapara-ah mm 215.9 a tla bawk a ni. IMD chuan ni hnih emaw ni thum emaw chhungin Assam state hmun hrang hrangah ruah nasa taka a sur chhunzawm an rin thu an sawi.

Guwahati-ah ruahsur nasa avanga kawtthlera tui tling khawm chuan traffic-ah harsatna a thlen a, hmun dangah thing tlu leh leimin hlauhawm tak tak a awm bawk. Thuneitute chuan an dinhmun chu uluk taka vilin, chhiatna thleng thei lakah an inralrin thu an sawi. Assam State Disaster Management Authority (ASDMA) chuan mipuite chu fimkhur reng turin an chah a, khualzinte leh veivakte chu ruahsur nasat hun laiin ṭul loah pawn chhuak lo turin an hriattir bawk.